ఆర్యా,

చిన్నప్పుడు మఱో విషయాన్ని చదువుకున్నట్లు గుర్తు వస్తోంది. దానిపై మీరు ఏమనుకుంటున్నారో అనే ఉద్దేశ్యంతో ఈ స్పందన వ్రాస్తున్నాను. వీలైతే మీ అభిప్రాయాన్ని తెలియజేయ ప్రార్ధన.

కర్ణుని అంతమొందించిన అర్జునుడు, ఇదంతా తన ఘన కార్యమని విఱ్రవీగుతుంటే, అందుకు కృష్ణభగవానుడు ఈ క్రింది విధంగా వివరిస్తారని చదువుకున్నాను.
"నాయనా అర్జునా, కర్ణుడు ఆరుగురి చేత చంపబడ్డాడు. అది ఎవ్వరంటే, నీ చేతను నాచేతను వరమడిగిన కుంతి చేతను, ధరచేతను, ఇంద్రుని చేతను, భార్గవుని చేతను చంపబడ్డాడు"
అంటూ ఆఱుగురిని ప్రస్తావించారు. కాకపోతే శల్యుడు వంటి వారు కారణ భూతులనేది మానవ ఆలోచనకు రూపకల్పనైతే, కర్ణుడు శల్యుని నిరాశ పఱచిన వైనాన్ని తెగనాడి చివ్వరిదాకా తన ప్రయత్నం చేసాడు. కాని భార్గవుని శాపానుసారం అశ్త్రాలు ఙ్ఞప్తికి రాకపోవడం ఒక కారణం అయితే, భూదేవి రధ చక్రాన్ని విడవకపోవడం మఱొక కారణం. ఇంద్రుని సంగతి తెలిసినదే.
ఇలాంటి విషయాన్ని మీకు తెలుసనుకుంటాను. తప్పుగా స్పందించి ఉంటే మన్నించ మనవి

చక్రవర్తి గారు చెప్పిందానితో ఏకీభవిస్తున్నాను. శ్రీమదాంధ్ర మహాభారతంలో కర్ణుడి చావుకు కారకులైవవారంటూ ఇచ్చిన జాబితాలో భీష్ముడూ, శల్యుడూ లేరు. శ్రీమదాంధ్రమహా భారతంలోంచే మీరూ కోట్ చేస్తున్నారు. మరి తేడా ఎక్కడొచ్చింది?

ఆవుదూడ చనిపోతే బ్రాహ్మణుడు శాపమివ్వటం నేను వినలేదు. ఇక భూదేవీ, అర్జునుడూ మీ జాబితాలో మిస్సయ్యారు.

తిక్కన రాసిన ఆ పద్యం ఇదీ-
‘నీ చేతను నా చేతను
వరమడిగిన కుంతి చేత వాసవు చేతన్
ధర చేత భార్గవు చేత
నరయంగా కర్ణుడీల్గె నార్వురి చేతన్’

ఒకవేళ ఈ పద్యానికి పాఠాంతరం ఏమైనా ఉందా?

ఈ పై పద్యం తిక్కనగారిది కాదనుకుంటానండి. ఇది కంద పద్యమైతే మొదటి పాదంలో ప్రాస కుదరలేదు కదా.

అసలు పద్యం ఇదనుకుంటానండీ!
కం॥ నరవర నీచే నాచే
వరమడిగిన కుంతిచేత వాసవుచేతన్
ధరచే భార్గవు చేతను
నరయంగా కర్ణుడీల్గె నార్వురి చేతన్ !

మొదటి పాదంలో ప్రాస...ఇది కాదు అసలు పద్యం...ఇది
నరవర! నీచే నాచే
వరమడిగిన కుంతిచేత వాసవు చేతన్
గురుచేత శల్యుచేతను
నరయంగా కర్ణు డీల్లె నార్గురిచేతన్

ఈశాపాదులు లేకుంటే అర్జునుని పైన కర్ణుడు విజయం పొందేవాడనా? ఎందుకు వచ్చిన మాటలు? ద్రౌపదీస్వయంవరంలో ఎందుకు అర్జునుని తట్టుకోలేకపోయాడు? ఘోషయాత్రలో కురురాజును గంధర్వులు చితకపొడుస్తుంటే ఎందుకు పారిపోయాడు? ఉత్తరగోగ్రహణంలో ఎందుకు నరుడిచేతిలో చిత్తయ్యాడు? ఏవేవే శాపాలూ గట్రా లేకుంటేనా అంటూ అనవసరమైన సానుభూతిని చూపకండీ కర్ణుడిపైన. తాను చాలనని తెలిసీ దుర్యోధనుణ్ణి యుధ్ధానికి ఎగద్రోసి ముంచింది వీడు కాదా? ద్రౌపది పంచభర్తృక కాబట్టి వివస్త్రను చేసినా తగునని ధర్మం చెప్పిన పాపి వీడు కాదా?