'త్రివిష్టపం' అనే మాటకు 'స్వర్గం' అనికదా అర్థమ్?
స్వరవ్యయం స్వర్గ నాక స్త్రిదివ స్త్రిదశాలయా:|
సురలోకో ద్యౌ దివౌ ద్వే స్త్రియాం క్లీబే త్రివిష్టపమ్||ఆమరకోశ:-1-1.
అని కదా?

ఆర్యా,
నా దగ్గరనున్న మహా భారత ప్రతి(లఘు టీక రచయిత శ్రీమాన్ ఉత్పల వేంకట రంగాచార్యులు)లో పేజీ క్రింద నున్న అథోసూచికలో అర్ధం అలా ఇవ్వబడింది. అదే నేను వ్రాసాను. మీ సందేహం చూసాక శబ్దరత్నాకరంలో చూస్తే మీరన్నట్లుగానే స్వర్గము,వేల్పుఁబ్రోలు అనే అర్థాలే వ్రాసి ఉన్నవి. బ్రౌణ్యంలో కూడా స్వర్గము అనే ఉంది. కాని ఇక్కడ త్రివిష్టపం అనే ఏకవచన పదాన్ని కాకుండా త్రివిష్టపంబులన్ అని బహువచనంలో ఉపయోగించుట వలన వారా అర్థాన్ని గ్రహించారేమో ననిపిస్తుంది నాకు. స్వర్గం అనేది ఒకటే కదా? స్వర్గాలు అనేవి (బహువచనం)ఉన్నాయా?
అలా లేకపోతే ముల్లోకములను అనే అర్థం ఎంతవరకూ సబబో నాకు తెలియదు. అందుచేత ప్రస్తుతానికి అది అలానే ఉంచాను.ఇంకా ఎవ్వరైనా దీనిమీద వారి అభిప్రాయాలు తెలియజేస్తారేమో చూద్దాం.

అయ్యా! నమస్కారములు.

నేను, పాఠకులకు ఇలాటి సందేహం కలుగ వచ్చు.అవకాశం ఉంది అనే అభిప్రాయంతో మాత్రమే అలా రాసాను.

ఇక వీషయానికి వస్తే మీరు రాసిన అర్థం తప్పేమీ కాదు.పైగా చాలా అర్థవంతమూ,ఆమోదయోగ్యమూనూ.
ముల్లోకాలనే అక్కడ అర్థం.ఉత్పలవారి వ్యాఖ్యానమూ సరియైనదే.
ఎందుకంటే 'త్రివిష్టపం' అనే పదమే కాకుండా 'విష్టపం' అని మరో పదముంది.దానికి 'లోకం' అనే అర్థం.అప్పుడూ మీరు ఇచ్చిన అర్థం ఏ నిరూపణ లేకుండానే ఘటిస్తుంది.
ధన్యవాదాలు.

అయ్యా! నమస్కారములు.

క్షమించండి.మరో మాట మీరేమనుకోనంటే....
పైన మీరు 'అధోసూచికలో' అని ప్రయోగించారు.కానీ అధస్సూచికలో/అధ:సూచికలో అని ఉండాలేమో!
(వయసులో చదువులో చిన్నవాడిని.కోపగించుకోకండి.ఆశీర్వదించండి.)
ధన్యవాదాలు.

మీరన్నదే సరియైనది.తప్పు సరిచేయటానికి వయసుతో సంబంధం లేదు.నేను వయసులో పెద్ద అవ్వచ్చు. కాని మీరు విద్యలో పెద్దలు. ఆచార్య స్థానంలో ఉన్నవారు.తప్పు సరిచేసే హక్కు మీ కెప్పుడూ ఉంటుంది.ఎవరి తప్పు వారికి చప్పున తెలియదు. తప్పు సరిచేసినందులకు మీకు నా ధన్యవాదములు.
ఆంధ్రమహాభారతం-ఆణిముత్యాలు ను తెలుగుసూచీలో చేర్చినందులకు మీకు నా ధన్యవాదములు.
ఇంకో విషయం.అన్నమయ్య పలుకుబడులు-జాతీయములు పేరున అన్నమయ్య సంకీర్తనలలోని నుడికారములను,సామెతలను,జాతీయములను ఆ యా సంపుటముల వారిగా ఈ బ్లాగులో ఉంచుతున్నాను.ఇప్పటికి రెండు సంపుటములు పూర్తి అయినవి.మూడో సంపుటం పూర్తి కావస్తున్నది. ఈ బ్లాగును కూడా ఓసారి చూడగలరు. బాగున్నట్టయితే టూల్బార్ కి అనుసంధించవచ్చు.
http://mutyalasaraalu.blogspot.com/
సెలవు.